ILOILO CITY – Nagalab-ot sa 19,534 ka benepisyaryo ang magabaton sang P6,000 nga Social Amelioration Program umpisa subong nga adlaw, Hulyo 3.
Sa interview sang Bombo Radyo kay May Castillo, tagpamaba sang Department of Social Welfare and Development Region 6, iya ginpahayag nga ang masobra sa 19,000 ka benepisyaryo ang kabahin sang 1st tranche nga wala nalakip sa listahan.
Suno kay Castillo, kabahin sa mga magabaton sang P6,000 amo ang mga ginakabig nga left out families gikan sa Capiz, Aklan, Antique, Guimaras kag Negros Occidental.
Ginpahayag ni Castillo nga ang pondo nga igapanghatag ang kabahin sang mga kantidad nga sobra sa pondo sang tagsa ka Local Government Unit.
Samtang, ang kwalipikado lamang sa 2nd tranche sang Social Amelioration amo ang mga benepisyaryo nga yara sa lugar nga ginpaidalom sa Enhanced Community Quarantine humalin sang Mayo 1-15.
Sa pagpaathag ni Castillo, diri sa bahin sang Western Visayas, ang Iloilo City kag Province lakip na ang Bacolod City ang makabaton sang ika duha nga hugnat sang Social Amelioration Program.
Ang nasambit nga mandu suno kay Castillo ang nasaad sa memorandum sang National Inter-Agency Task Force apang wala pa sang petsa kun san-o ang distribution.
