ILOILO CITY – 12 ka panibag-o nga kaso sang kumpirmado nga kaso sang Coronavirus Disease 2019 (COVID-19) ang na record sa Western Visayas.
Suno kay Dr. Renilyn Reyes, COVID-19 spokesperson kag pinuno sang public health programs development cluster sang Department of Health Region 6, as of July 3, yara na sa 365 ang kumpirmado nga kaso samtang nagapabilin naman sa 148 ang naka-recover kag 11 ang patay.
Sa 664 ka laboratory results, 13 ang nagpositibo apang isa diri ang ginpaidalom sa repeat test kun sa diin 3 sa 12 ka mga pasyente ang na-admit sa hospital samtang ang mga nabilin naman ang naka facility quarantine.
Kalabanan sa mga pasyente ang tumandok sang Negros Occidental, Iloilo City kag Iloilo Province.
Apisar sini, indi pa makumpirma kun bala may yara sang local transmission nga nagakatabo sa subong.
Kun pahat-pahaton, ang Aklan ang may 6 ka COVID-19 cases, Antique ang may 15, Capiz ang may 6, Iloilo Province ang may 40, Negros Occidental ang may 4, Bacolod City ang may 11, Iloilo City ang may 31 kag 252 sa mga repatriates.
