ILOILO CITY – Nagapangatubang sang duha ka criminal kag isa ka administrative charges si Punong Barangay Niel Parcon sang Liberation, Iloilo City may kaangtanan sa hatagay sang relief goods bangud sa ginapatuman nga quarantine protocol.
Sa interview sang Bombo Radyo kay Police Col. Gervacio Balmaceda, pinuno sang Criminal Investigation and Detection Group Region 6, iya ginpahayag nga may complainant nga nagpalab-ot sang reklamo batok kay Parcon.
Santo sa panaysayon sang complainant suno kay Balmaceda, may ginbaisan sila ni Punong Barangay Parcon rason nga humalin sang Abril 15, wala na siya nakabaton sang relief goods kag wala man ginhatagan sang quarantine pass.
Ginpahayag pa sang complainant nga sang wala pa sila sang away ni Punong Barangay Parcon, nakabaton pa siya sang relief goods kag P6,000 nga financial Assistance sa idalom sang Social Amelioration Program.
Sa pagpaathag naman ni Punong Barangay Parcon, pinulitika ang rason kun nga-a nagdangop gid sa Criminal Investigation and Detection Group ang tagreklamo nga anak sang 1st Barangay Kagawad sa ila lugar.
Suno kay Parcon, nagasalig siya nga indi magdulot ang kaso bangud nga hayag ang iya pagpamuno bilang Punong Barangay sang Liberation.
Sa pagkamatuod suno kay Parcon, nag-ugat ang tanan sang iya ginsaway ang pamilya sang tagreklamo bangud sa pagpatigayon sang birthday party apisar nga ginadumili-an ang mass gathering.
Kun tuhoy naman sa pagpanghatag sang relief goods, ginpahayag ni Parcon nga isa sa mga benepisyaryo ang tagreklamo kag kasubong nga nagsunggod lamang umpisa sang natabo ang komosyon.
Bangud sini, ginpahayag sang Punong Barangay nga kun istriktuhon, mas madamo pa ang deserving nga pumuluyo nga lubos nga nagakinahanglan sang ayuda bangud nga ang tagreklamo ang nagapanag-iya sang sari-sari store.
