GUIMARAS – Nadugangan pa gid ang numero sang mga barangay sa Guimaras nga naapektuhan sang oil spill kasunod sang paglupok sang power barge sang AC Energy Corporation sa Zone 3 Bo. Obrero, Lapuz, Iloilo City.
Sa interview sang Bombo Radyo kay Lt. Commander Jose Jacinto Jr. sang Philippine Coast Guard – Guimaras, iya ginpahayag nga sa banwa sang Jordan, nakalab-ot na ang nagtagas nga langis sa kalalawran nga sakop sang Hoskyn, Rizal kag Balcon Melliza.
Suno kay Jacinto, magluwas sa banwa sang Jordan, una na nga naglapta ang langis sa mga coastal barangay sang Buenavista nga ginalakipan sang Sto. Rosario, Magsaysay, Zaldivar kag Sawang.
Ginpahayag ni Jacinto nga may posibilidad pa nga maglapad ang oil spill depende sa ilig sang tubig kag kun indi gilayon maagapan.
Sa subong, ginpahayag ni Jacinto nga sa bahin sang Hoskyn, nagbuligay naman ang mga pumuluyo sa pagpanguna sang barangay officials sa pagpanguha sang nagtagas nga langis apisar nga hunas ang tubig.
