ILOILO CITY- Nagpatigayon na sang rapid assessment ang Guimaras Provincial Government sa halit sang oil spill sa nasambit nga probinsya kasunod sang paglupok sang power barge sang AC Energy sa Bo. Obrero, Lapuz, Iloilo City.
Sa interview sang Bombo Radyo kay Guimaras Governor Samuel Gumarin, iya ginpahayag nga ang assessment ang nagasakop sang epekto sang oil spill sa ekonomiya, sa palibot, kag sa pumuluyo.
Suno kay Gumarin, padayon subong ang pag-collate sang data kag ginalauman nga mapagwa na ang resulta sang rapid assessment buas nga adlaw, Hulyo 10.
Nahibaluan nga nagdamo pa gid ang mga barangay nga nalab-ot sang oil spill sa diin 17 ka coastal barangays apektado sa Buenavista, walo sa Jordan, kag tatlo sa San Lorenzo.
Samtang, sa interview naman sang Bombo Radyo kay Mayor Eugene Reyes sang Buenavista, Guimaras, iya ginpahayag nga ginatun-an na ang pagdeklarar sang state of calamity sa banwa.
Suno kay Reyes, nagpatigayon na sila sang emergency meeting sa 17 ka mga coastal barangays sa banwa angot sa nasambit nga plano.
Samtang ginkumpirma naman sang alkalde nga magatanyag sang cash for work ang AC Energy sa mga pumuluyo apang 20 lang ka mga residente sa tagsa ka apektado nga barangay ang i-hire para magbulig sa oil spill clean up.
