ILOILO CITY- Wala nauyunan sang alkalde sang Syudad sang Iloilo ang pagkauyaya sang AC Energy sa pagtalupangod sa problema nga ila natuga kasunod sang paglupok sang ila power barge sa Bo. Obrero, Lapuz, Iloilo City nga nagresulta sa lapnagon nga oil spill.
Sa interview sang Bombo Radyo Iloilo kay Mayor Jerry Treñas kadungan sang iya pagpadulong sa mga evacuation centers sang mga apektado nga pumuluyo, iya ginpahayag nga dismayado siya sa iya nakit-an.
Suno kay Mayor Treñas, dapat nga talupangdon sang AC Energy ang problema nga ila gintuga ilabi na sa mga apektado nga pumuluyo.
Pahayag pa ni Treñas, kinahanglan nga indi delayed ang pagkaon sang mga evacuees, wala nagaupod ang mga tigulang sa kabataan sa isa ka kwarto, wala sang may nagahigda sa salog nga wala sang hapin kag nagakadapat nga may medical team gid sa tagsa ka evacuation center.
Gindugang naman sang alkalde nga naghingyo na ini sa City Legal Officer nga magpreparar sang memorandum sa posibilidad sang criminal negligence sang AC Energy kag ang salabton sang tag-iya sa natabo nga oil spill.
