ILOILO CITY – Nagpabutyag sang pagkadismaya si Punong Barangay Woody Dela Riarte sang Kauswagan, Iloilo City may kaangtanan sa ginapahayag mahinay nga pag-aktu sang City Health Office.
Ini ang kasunod sang pagpositibo sa COVID-19 sang duha ka empleyado sang SM Delgado matapos ang Rapid test nga ginpatigayon apang kinahanglan pa sila nga kuhaan sang swab sample para sa COVID-19 test agud nga makasiguro.
Sa interview sang Bombo Radyo kay Dela Riarte, iya ginpahayag nga mismo ang landlord ang nagpahibalo sa iya nga nagpositibo sa COVID-19 ang isa sa iya boarders kag nagahingyo sang panugyan kun ano ang makapaayo nga himuon.
Suno kay Dela Riarte, gilayon siya nga nagpadulong sa City Health Health agud magpangayo sang bulig apang kasubong nga ginpasa-pasahan lang siya.
Ginpahayag ni Dela Riarte nga kun tani, may yara gilayon sang aktu ang City Health Office bangud nga ang isa pa gid ka empleyado nga nagpositibo sa Rapid test ang nakapaidalom na sa quarantine.
Kasubong suno sa natungdan nga ginabasol pa ang mall management nga nagpatigayon sang Raid test apang wala man lang sang kaugalingon nga quarantine facility.
Naligaran pa sang isa ka adlaw suno sa Punong Barangay antes nadala sa facility quarantine ang nasambit nga empleyado rason nga apisar wala pa sang confirmatory test, ginkulbaan ang mga residente sa ila lugar sa posibilidad sang local transmission.
