Kita tanan ang may yara sang mga paborito — kaangay na lang sang paborito nga pagkaon, paborito nga panapton kag paborito nga lugar.
Apang ikaw, ano bala ang imo paborito nga duag?
Madamo sang mga manami nga lugar nga mahimo mabisita sa South Korea apang kun luyag mo nga dugangan sang exciting nga content ang imo Instagram feed, idugang sa imo itinerary ang Purple island.
Bangud may yara pa sang kahangawa sang COVID-19 subong, madamo ka pa sang oras agud nga planohan ang imo masunod nga adventure.
Gani indi gid pagkalimtan ang Purple Island.
Sa pangalan pa lang sang isla, ini ang ginapalibotan sang lavender, duag purple nga mga balay, taytay kag dalan.
Nagtanom ang mga residente sang Banwol Island kag Parkji Island sang 40,000 nga mga lavender plants lakip na ang linibo nga mga empress trees.
Ang ginadagsa sang mga dumuluong amo ang purple Cheona Bridge nga naga konekta sa duha ka mga nasambit nga isla ilabi na kun gab-i bangud naga banaag ang duag.
Indi lamang mga balay ang purple kundi mangin ang mga hotel rooms, restaurants kag restrooms ang duag purple man kag mangin ang mga salakyan.
Kun luyag mo mag check in, ang purple-colored rooms ang naga balor 50,000 Korean Won ukon P2,060 lang ang kada gab-i.
Gani, sa mga nagaplano nga maglagaw sa luwas sang pungsod, ihanda na ang passport kag unahon sa inyo travel list ang Purple Island sa South Korea.
