NEW LUCENA, ILOILO – Nagapabilin sa gihapon sa facility quarantine sang New Lucena, Iloilo ang isa ka Locally Stranded Individual nga nagpositibo sa Coronavirus Disease 2019 (COVID-19).
Sa interview sang Bombo Radyo kay Mayor Liecel Mondejar-Seville, iya ginpahayag nga ang 36 anyos nga lalaki amo ang labing una nga COVID-19 case sa banwa sang New Lucena.
Suno kay Seville, nag-abot sa Iloilo ang nasambit nga Locally Stranded Individual sang Hunyo 26 sakay sa barko halin sa Metro Manila, gilayon nga ginsugat kag ginderetso padulong sa facility quarantine.
Ginpahayag ni Seville nga manugtapos na kun tani ang quarantine period sang nasambit nga Locally Stranded Individual apang sang Hulyo 10 sang nagguwa ang positibo nga resulta sang confirmatory test.
Sa subong, may apat pa ka Locally Stranded Individual ang nagatinir sa facility quarantine sang New Lucena samtang ang duha naman ka repatriated Overseas Filipino Workers nga residente sang nasambit nga banwa ang nagapabilin sa hotel sa syudad sang Iloilo.
