ILOILO CITY- Liwat nga ginbasura sang korte ang motion for reconsideration nga gin-file sang Panay Electric Co. Inc. (PECO) angot sa nauna nga desisyon sang Regional Trial Court batok sa kompaniya.
Sa interview sang Bombo Radyo kay Atty. Hector Teodosio, legal counsel sang More Electric and Power Corporation (MORE Power) , iya ginpahayag nga santo sa order nga napetsahan Hulyo 2, 2020, gindismiss ni RTC Branch 23 Judge Emerald Requina-Contreras ang nasambit nga mosyon sa rason nga wala na sang franchise para maka-operate ang nasambit nga power distributor.
Suno kay Teodosio, ginplastar man sang korte nga wala man sang certificate of public convenience and necessity (CPCN) ang PECO agud mag-operate samtang may ginauyatan naman nga prangkisa kag provisional CPCN ang MORE Power.
Matandaan nga nauna nga nagpagwa sang desisyon ang korte nga nagmando sa sheriff nga ibutang ang MORE Power bilang bag-o nga nagapanag-iya sang propedad sang PECO nga nalakip sa expropriation.
Makapila naman ka beses nga nagdangop sa Court of Appeals ang PECO para sa temporary restraining order (TRO) agud punggan ang expropriation case sa Iloilo RTC sa diin gindeny naman ini sang Court of Appeals.
Ginpahayag namn ni Teodosio nga kadungan sang desisyon sang korte sa motion for reconsideration, nagpagwa man si Judge Contreras sang desisyon sa motion to inhibit nga gin-file sang PECO batok sa iya.
Suno sa natungdan, nag-isyu sang order si Contreras nga maga-inhibit naman ini sa kaso.
Samtang, ginkakibot sang Panay Electric Company ukon PECO ang pagpaggwa sang desisyon sang korte.
Sa interview sang Bombo Radyo kay Atty. Estrella Elamparo, iya ginpahayag nga wala nila ginlauman nga magapagwa sang desisyon si Judge Contreras angot sa motion for reconsideration nga gin-file sang kompaniya.
Suno kay Elamparo,ini bangud nga ila ginkasugtan sa ulihi nga hearing nga unahon ni Contreras ang pagresolba sa motion to inhibit antes ang iban nga mga mosyon sang PECO.
