ILOILO – Ipatawag sang Department of Labor and Employment ang mga opisyal sang AC Energy kasunod sang natabo nga oil spill nga nag-apekto indi lamang sa syudad sang Iloilo kundi lakip sa sa probinsya sang Iloilo kag Guimaras.
Sa interview sang Bombo Radyo kay Niezel Sabrido, tagpamaba sang Department of Labor and Employment Region 6, iya ginpahayag nga wala pa sang petsa kun san-o patigayunon ang technical conference bilang kabahin sang inspection kag imbestigasyon.
Suno kay Sabrido, wala pa sang pinal nga desisyon ang ahensya tuhoy sa natabo apang sa subong, ginapa-comply ang AC Energy sang mga requirements tuhoy sa Occupational Safety and Health program sang kompaniya.
Ginpahayag ni Sabrido nga ang maathag lang amo nga indi competent ang safety officer sang kompaniya rason nga naglupok ang power barge.
Ginpasalig sang natungdan nga padayon ang regular inspection sang DOLE team sa tagsa ka mga kompaniya bilang pagsunod sa Occupational Safety and Health Law.
Apisar sang natabo, ginpahayag ni Sabrido nga wala sang rason nga hatagan sang work stoppage order ang AC Energy.
Minimal ang epekto sang oil spill sa Mangroves, isda kag mga pakinhason sa pila ka coastal towns sa probinsya sang Iloilo.
Sa interview sang Bombo Radyo kay Mitzi Peñaflorida, Senior Environmental Management Specialist sang Provincial Environment and Natural Resources Office, iya ginpahayag nga sa pagbuligay sang stakeholders, indi tanto ang halit sa palangabuhi-an sang fisherfolks.
Suno kay Peñaflorida, nakabulig ang Habagat bangud nga ang direksyon sang nagtagas nga langis ang padulong sa probinsya sang Guimaras.
Ginpahayag ni Peñaflorida nga duha ka occular inspection ang ginpatigayon sa pagpamuno ni Dr. Rex Sadaba, isa ka marine biologist kag anay program manager sang University of the Philippines-Visayas Oil Spill Response Program.
Apisar sang minimal nga epekto, wala pa ginapanugyan ang pagkaon sang isda kag pakinhason kun sa diin magapaguwa sang abiso ang tagsa ka Local Government Unit kun may yara na sang update.
