Mabalik na kuntani sa trabaho ang 49 anyos nga babaye nga tumandok sang Guimbal, Iloilo kag bilang requirement kinahanglan ini ipa-idalom sa nasal swab test sa diin natukiban nga nagpositibo ini sa Coronavirus Disease 2019.
Sa interview sang Bombo Radyo kay Dr. Jay Dorin, Guimbal Municipal Health Officer, iya ginpahayag nga naghalin sa banwa sang Guimbal ang babaye Hunyo 22 kag nagpadulong sa probinsya sang Guimaras.
Umpisa sadto, wala na ini makabalik pa sa Guimbal suno man sa panaysayon sang iya anak nga nagatinir sa amo nga banwa.
Suno kay Dorin, wala man sang ihibalo ang anak sini kun sa diin partikular nga lugar nagtinir ang iya iloy sa Guimaras.
Dugang pa sang natungdan, palaligban kun sa diin nakuha sang 49 anyos ang nasambit nga virus.
Sa subong nagapabilin ang COVID-19 patient sa syudad sang Iloilo sa diin siya gina-quarantine.
