ILOILO CITY- Nagsalangisag ang pila ka mga repatriated Overseas Filipino Workers(OFW) nga nagpauli sa Iloilo gikan sa Manila sakay sa duha ka PAL sweeper flights kaina sang kaagahon.
Sa interview sang Bombo Radyo kay John Red Giso, isa ka OFW, iya ginpahayag nga sang ginsugat sila sa Iloilo International Airport kag gindala sa Jubilee hall, wala sang may nag-atubang sa ila sa nasambit nga quarantine facility.
Suno kay Giso, nagtanga sila sang inoras sa lobby sang Jubilee hall kag wala sang husto nga instruction sa ila.
Pahayag pa niya, ginkabalak-an man nila nga posible tingubon lang sila sa isa ka komon nga kwarto upod sa iban nga nauna na nga naka-quarantine.
Nahibaluan nga sa nagpauli nga mga repatriated OFWs, 25 ang taga Iloilo City, 107 ang taga- Iloilo Province,18 ang taga- Aklan, 20 ang taga- Antique,23 ang taga- Capiz, kag walo ang taga- Guimaras.
Ginpangdala ang mga ini sa quarantine facilities sang ila tagsa ka Local Government Unit para magpaidalum sa RT-PCR Test kag 14-day nga mandatory quarantine.
