ILOILO CITY – Ginahulat pa ang resulta sang Reverse Transcription Polymerase Chain Reaction (RT-PCR) test sang mga empleyado antes dulaon ang lockdown sa bug-os nga compound sang Technical Education and Skills Development Authority Region 6.
Sa interview sang Bombo Radyo kay TESDA Region 6 Director Gaspar Gayona, iya ginpahayag nga 7 sa 25 ka mga empleyado sang nasambit nga ahensya ang ginpaidalom sa RT-PCR test bangud nga ang 18 ang makabig nga low risk matapos nga nagpositibo sa Coronavirus Disease 2019 (COVID-19) ang isa ka empleyado.
Suno kay Gayona, kun may yara sang magpositibo, automatic nga ipaidalom sa RT-PCR test ang 18 ka mga ginakabig nga low risk.
Ginpahayag ni Gayona nga tanan sila ang nagapaidalom sa quarantine apang buwas, Hulyo 16, magatapos na ang ila quarantine period.
Kun lunsay magnegatibo ang resulta sang RT-PCR sang 7 ka empleyado, mahimo nga sa masunod nga semana, pagabuksan na ang bug-os nga compound sang TESDA Region 6.
Sa subong, yara na sa recovering status ang isa ka personnel nga una nga nagpositibo sa COVID-19.
