ILOILO – Nagalaum ang League of the Municipalities of the Philippines-Iloilo Chapter nga aprobahan sang National Inter-Agency Task Force ang hinyo nga ipauntat anay ang pagpauli sang mga Locally Stranded Individual sa Iloilo.
Ini ang kasunod sang resolusyon nga ginduso sang League of the Municipalities of the Philippines-Iloilo Chapter nga ginpaagi kay Gov. Arthur Defensor Jr.
Sa interview sang Bombo Radyo kay San Enrique Mayor Trixie Fernandez nga nagaserbe nga presidente sang LMP-Iloilo Chapter, iya ginpahayag nga ang katuyu-an sang ila paghingyo amo nga kun tani, mangin organisado ang pagpapauli sa mga Locally Stranded Individuals.
Suno kay Fernandez, wala ginapamatukan ang pagpapauli sa mga Locally Stranded Individuals kundi luyag lamang nila nga mga alkalde sa probinsya sang Iloilo nga masolbar ang pagginutok sa mga quaarantine facility bangud sa atrasado nga pagpaguwa sang resulta sang COVID-19 test.
Ginpahayag ni Fernandez nga bangud sa indi systematic nga repatriation, halos katunga sang numero sang mga frontliners ang nalatnan sang virus rason nga sa subong, problema ang manpower.
Magluwas diri, isa man sa mga rason suno sa alkalde amo nga tuman ka taas ang infection rate nga na record sa tagsa ka adlaw sa bug-os nga Western Visayas.
