Mapabilin sa Modified General Community Quarantine -medium risk ang syudad kag probinsya sang Iloilo umpisa subong nga adlaw Hulyo 16 tubtob sa Hulyo 31.
Ini ang gin-anunsyar kagab-i ni Presidential Spokesman Atty. Harry Roque kaupod ang mga myembro sang National Inter-Agency Task Force kag ni Presidente Rodrigo Duterte.
Magluwas sa syudad kag probinsya sang Iloilo, ang nabilin nga mga lugar sa Western Visayas kaangay sang Capiz, Negros Occidental, Bacolod City, Aklan, Guimaras kag Antique ang yara man sa Modified General Community Quarantine -medium risk.
Sa idalom sang MGCQ-medium risk, apisar nga bukas na ang ekonomiya, kinahanglan sa gihapon nga ipatuman ang minimum health standards kaangay sang pagsuksok sang facemask kag social distancing.
Mahimo man nga magdeklara ang local government unit sang lockdown sa partikular nga lugar kun kinahanglanon.
Kag sa bahin sang mga Locally Stranded Individuals kag repatriated Overseas Filipino Workers, dapat sila batunon sang local government unit apang kinahanglan nga i-quarantine kag ipa-idalom sa RT-PCR test.
Ang Cebu City ang ginpa-idalom naman sa Modified Enhanced Community Quarantine.
