ILOILO CITY – Nagapangabay ang Commission on Human Rights nga iplastar sang maayo ang ginaduso nga Oplan Kalinga may kaangtanan sa house-to-house search sa pagpangita sang COVID-19 asymptomatic nga naga-home quaratine agud dal-on sa isolation facilities.
Sa interview sang Bombo Radyo kay Atty. Jonnie Dabuco, Regional Director sang Commission on Human Rights Region 6, iya ginpahayag nga wala man ginabalagan sang independent constitutional office ang Oplan Kalinga apang kinahanglan nga masiguro nga wala sang may malapas nga tawhanon nga kinamatarong.
Antes ipatuman ang Oplan Kalinga, nagakadapat suno kay Dabuco nga specific ang guidelines agud nga indi man mabutang sa alang-alang ang COVID-19 asymptomatic lakip man ang law enforcement team.
Ginpahayag ni Dabuco nga makabig nga illegal ang pagsulod sa isa ka private property kun wala sang warrant of arrest apang ginapahanugutan ang warrantless arrest kun may krimen nga natabo.
Sa pagpaathag sang natungdan, indi man makabig nga krimen ang pag-angkon sang virus kag labi sa tanan, wala sang bisan isa nga maluyag nga malatnan sang virus.
May kaangtanan diri, security kag assistance lamang ang igahatag sang Philippine National Police sa baylo nga pangunahan ang pagpatuman sang Oplan Kalinga.
Gin-athag ni Police Col. Gilbert Gorero, tagpamaba sang Police Regional Office 6, nga ang Local Government Unit sa gihapon ang magapanguna sa house-to-house visitation kag sa pagtumod sang address sang COVID-19 asymptomatic.
Sa pagpaathag ni Gorero, magapakig-angot ang Philippine National Police sa tagsa ka Local Government Unit agud nga wala sang problema sa tion nga madayon ang nasambit nga plano.
Apisar sang mga pagpamalabag kag pagpangduha-duha, ginpahayag sang natungdan nga dapat lantawon ang positive side sang nasambit nga plano bangud nga ang katuyu-an lamang sini amo nga malimitahan ang local transmission sang virus.
