ILOILO CITY – May yara sang 10 ka adlaw agud nga makapaathag ang pamunu-an sang Wander Pool sa The Castle Hotel sa Bonifacio Drive, Danao, Iloilo City kun nga-a indi dapat pagbawi-an sang permit kasunod sang natabo nga pool party apisar sang ginapatuman nga community quarantine.
Sa interview sang Bombo Radyo kay Norman Tabud, pinuno sang Business Permits and Licensing Office, iya ginpahayag nga napadal-an na sang Notice of Revocation of Permit ang pamunu-an sang pamunu-an sang Wander Pool.
Suno kay Tabud, ginpadala gilayon ang notice kasunod sang nabaton nga investigation report sang Iloilo City Police Office kun sa diin nakasaad nga maathag nga may yara sang paglapas sa layi.
Kun mapaslawan nga makahatag sang sabat, bawi-an sang business permit ang nasambit nga negosyo.
Nahibalu-an nga lakip sa mga pasakaan sang kaso sang City Legal Office amo ang tag-iya sang Wander Pool nga si Carol Sanchez kag ang mga nagtambong sa pool party nga sanday Renzi Flores nga anak ni Oton, Iloilo Mayor Carina Flores, DJ nga si Eric Gella, Michael Koopmans, Ched Puertollano, Nenya Pama, Jose Ena Uy, Sofie Garucho, Kristine Kate Lagos, Khanz Gonzaga kag Izza Mariano.
