Nagapanawagan ang Department of Health nga kinahanglan i-angay sang mga Pilipino ang batasan sa new normal kun luyag sang pungsod nga mangin madinalag-on sa pagpapas sa Coronavirus Disease 2019 (COVID-19).
Suno kay Department of Health Undersecretary Maria Rosario Vergeire, tuman ka kritikal kun paga-istoryahan ang pamatasan sang mga Pilipino subong nga may pandemya bangud kun indi magbag-o ang tawo sa ila naandan kag indi magsunod sa bag-o nga mga pagsulundan, mabudlayan ang Pilipinas nga makabangon kag makalampuwas sa ginapangatubang nga krisis.
Amo man ang nangin punto ni testing czar Vince Dizon sa diin iya ginpahayag nga ang disiplina ang nangin common denominator sa South Korea kag Taiwan.
Kun ang tanan nga minimum health standards kaangay sang insakto nga pagsuksok sang face mask, pag obserba sang social distancing kag regular nga paghugas sang kamot ang ginasunod sang publiko, mahimo nga magnubo ang kaso sang COVID-19 sa Pilipinas.
Samtang ginpaandaman man ni Vergeire ang mga naka rekober na sa COVID-19 nga indi pagpabay-an ang ikaayong lawas bangud may yara sa gihapon sang tyansa nga ma-infect ini liwat sang virus.
