ILOILO CITY – Natalana nga ipaidalom sa Rapid test ang ginabanta 6 ka mga naka-angkon sang close contact sa 80 anyos nga lalaki nga ginbawi-an sang kabuhi kag ulihi natukiban nga nagpositibo sa Coronavirus Disease 2019 (COVID-19).
Sa interview sang Bombo Radyo kay Barangay Kagawad Sumakwel Nava sang Libertad, Lapuz, Iloilo City, iya ginpahayag nga nakapadulong sa ila lugar ang tigulang nga residente sang Bo. Obrero sa distrito man sang Lapuz.
Suno kay Nava, nakatambong pa sa barangay fiesta sang Libertad sang nagligad nga Hunyo 24 ang nasambit nga tigulang.
Magluwas diri, masami man nga nagapangayaw sa ila lugar ang biktima agud nga maghampang sang Chess kag anay Barangay Secretary man sang Libertad ang iya utod nga babayi.
Una na nga ginpanugyan sang health experts suno kay Nava nga kuhaan sang Swab sample ang mga naka-angkon sang close contact apang sang ulihi, ginduso nga ipaidalom na lang sila sa Rapid test sa masunod nga inadlaw.
Apisar nga tuman ka gamay sang risgo apang ginpanugyanan anay nga magpaidalom sa home quarantine ang mga naka-angkon sang close contact sa nasambit nga tigulang.
