LEON, ILOILO – Wala pa sang data si Mayor Ma. Lina Holipas may kaangtanan sa kabug-usan nga balor sang halit matapos nasunog ang merkado publiko sang Leon, Iloilo.
Sa interview sang Bombo Radyo kay Holipas, iya ginpahayag nga wala pa nakapasa sang report ang Bureau of Fire Protection may kaangtanan sa halit sang sunog.
Suno kay Holipas, naglab-ot sa 21 ka fire truck ang nagresponde antes napalong ang kalayo.
Ang nasunog suno kay Holipas amo ang mga stall sa vegetable, fish kag meat section sa sulod sang merkado kag may iban nga stall sa palibot nga naulamid.
Suno naman sa negosyante nga si Jerson Rodriguez, ginabanta nga 30% lang sang iya baligya ang nasalbar.
Ginpahayag ni Rodriguez nga ginabanta nga yara sa isa ka milyon ang balor sang nasunog nga grocery items.
Ang Sabado nga adlaw suno kay Rodriguez amo ang market day sa banwa sang Leon apang sa subong, ginasirado ang merkado agud hatagan sang ligwa ang ginapatigayon nga disinfection.
