ILOILO CITY–Importante nga mahibaluan ang kapasidad sang mga kabataan kag manunudlo sa pagpatigayun sang nagkalain-lain nga modalities agud mapadayun ang edukasyon sa tunga sang pandemya.
Sa interview sang Bombo Radyo kay Dr. Zaldy Tondo, Officer-In-Charge sang Oton National High School , iya ginpahayag nga pinaagi sa division learning continuity plan, mahimo na nga makapadayun sa pagtuon ang mga kabataan.
Suno kay Tondo, sa subong nga yara sa new normal ang sitwasyon bangud sa pandemya, importante nga mahibaluan kun ano nga sahi sang learning delivery modality ang masarangan kuhaon sang tagsa ka mga estudyante.
Ginpahayag sang natungdan nga lakip sa mga modalities nga mahimo kuhaon sang mga kabataan amo ang online based instructions, modular, blended learning, lakip na ang radio kag tv based instructions.
Magluwas sa sa kapasidad sang mga kabataan suno sa natungdan, importante man nga mahibaluan ang kapasidad sang mga manunudlo kaangay nalang sa paggamit sang nanari-sari online platform para sa online teaching, lakip na sa kun paano mapasigurado ang maayo nga komunikasyon sa mga learners.
