STA. BARBARA, ILOILO – Pilason ang isa ka pulis matapos makabunggo ang ginamaneho nga pick up sa isa ka drug store sa Barangay San Sebastian, Sta Barbara, Iloilo.
Ang biktima amo si Police Captain Norbert Sipol, 40, residente sang Barangay Balibagan Este, Sta Barbara, Iloilo kag nakadestino sa 602nd Company sang Regional Mobile Force Battalion Region VI sa Tapaz, Capiz.
Sa exclusive interview sang Bombo Radyo kay Police Major Raymond Celoso, hepe sang Sta. Barbara Municipal Police Station, iya ginpahayag nga naghalin sa Tapz, Capiz si Sipol kag papauli kuntani sa ila balay.
Apang pag-abot sa Barangay San Sebastian, Sta Barbara, Iloilo, napiyungan ini tubtub nadulaan sang kontrol sa iya manebela tubtub nabungguan niya ang signage sang isa ka gasoline station kag nagderetso sa drug store nga nahamtang sa nasambit man nga lugar.
Gilayon man nga gindala sa ospital ang pulis matapos mag-angkon sang pilas sa nagakalain-lain nga bahin sang iya lawas.
