ILOILO CITY – Naglab-ot na sa 197 ka indibidwal ang napaidalom sa COVID-19 test kasunod sang kamatayon sang 80 anyos nga tigulang nga nagpositibo sa Coronavirus Disease 2019 (COVID-19) sa Zone 2, Bo. Obrero, Lapuz, Iloilo City.
Sa interview sang Bombo Radyo kay Iloilo City Mayor Jerry Treñas, iya ginpahayag nga sa subong, ginatinguhaan nga matapos gilayon ang contact tracing sa mga naka-angkon sang close contact sa Patient no. 679 kag sa tiayon kag anak sini nga nagpositibo man sa COVID-19.
Suno kay Treñas, ang iban sa mga naka-angkon sang close contact nga wala nakuhaan sang specimen ang ipaidalom na lang sila sa home quarantine.
May kaangtanan diri, nagpaguwa na sang Executive Order si Treñas kun sa diin ginpaidalom sa Surgical Extreme Enhanced Community Quarantine ang 20 ka balay nga magalawig sang 72 oras ukon tubtub sa 8:00 sang gab-i sang Hulyo 25.
Sa pagkamatuod suno kay Treñas, nag-umpisa na ang pagbantay sa palibot sang Zone 2 agud nga masiguro nga wala sang may makaguwa-sulod kag nahatagan naman sang food packs ang mga apektado nga residente.
Ginpahayag ni Treñas nga iya na nga ginhingyo ang Department of Health nga himuon nga prayoridad ang pagproseso sang specimen sang 197 ka mga indibidwal.
