ILOILO CITY – Napun-an sang paglaum ang ika-duha nga State of the City Address ni Iloilo City Mayor Jerry Treñas subong nga adlaw, Hulyo 24 nga ginpaagi sa Facebook Live kag naglawig sang kapin sa 20 minutos.
Suno kay Treñas, indi mahinago nga tuman ka daku ang nangin epekto sang Coronavirus Disease 2019 (COVID-19) sa ekonomiya sang syudad sang Iloilo.
Ginpahayag ni Treñas nga perfect vision ang iya nga ginahandum subong nga 2020 apang sa wala ginlauman, natabo ang pandemya kun sa diin apektado ang kadam-an.
Apisar sang pagpanghangkat, ginpahayag ni Treñas nga indi dapat mangin upang ang pandemya agud nga magpadayon sa pagpangabuhi kag paagi diri, napamatud-an ang Bayanihan Spirit sang mga Ilonggo.
Apisar nga indi ini ang tion agud nga magkalipay apang ginpahayag sang alkalde nga dapat nga magpasalamat ang tanan sa naangkon nga pagkilala sang Iloilo City.
Lakip na diri amo ang pagkilala sa syudad sang Iloilo bilang Safest City sa Southeast Asia, Most Business Friendly Highly Urbanized City Outside Metro Manila, ASEAN Clean Tourist Award kag ang pagbaton sang award sang City Disaster Risk Reduction and Management Council sa 21st Gawad Kalasag Award.
Magluwas diri, ginpatpat man ni Treñas ang mga programa nga nahatag sa mga Ilonggo kasubong sang scholarship sa mga Day Care Teachers agud nga maka-angkon sang Diploma sa Early Childhood Education, paghatag sang palangabuhian ilabi na sa mga nadulaan sang trabaho bangud sa COVID-19 kag ang pagpatukod sang Dialysis Center nga mahimo na nga magamit sa madali nga tion.
