ILOILO CITY – Mahimo nga buwas nga adlaw, Hulyo 25, mapasa na sa City Health Office kag sa Regional Epidemiology and Surveillance Unit ang resulta sang COVID-19 test sang kapin sa 200 ka residente sang Zone 2, Bo. Obrero, Lapuz, Iloilo City.
Ini ang kasunod sang tatlo ka indigenous case nga na record sa nasambit nga lugar kun sa diin isa ka pasyente ang ginbawi-an sang kabuhi.
Sa interview sang Bombo Radyo kay Dr. Stephanie Abello, chief pathologist sang Western Visayas Medical Center Subnational Laboratory, iya ginpahayag nga ginatapos na ang validation sa mga test results agud masigurado nga wala sang sala.
Sa subong suno kay Abello, may isa ka team nga nagaproseso sang backlogs kag may isa naman ka team nga nagaproseso sang current specimens agud nga mapadasig ang pagpaguwa sang resulta.
Sa bahin sang backlogs, naglab-ot pa sa 560 ka specimen ang under process apang lauman nga ini ang matapos sa labing madali nga tion.
Lima na ka machine ang operational sa pagproseso sang specimen.
Sa pagpaathag ni Abello, tatlo ka RT-PCR machines kag duha ka RNA extraction machines ang naga-andar.
Ang kadamuon sang ginapaguwa nga specimen ang nakadepende naman sa masarangan sang manpower.
Sa subong, ginpahayag sang natungdan nga ginhingyo na nila sa Department of Health central office kag sa Research Institute for Tropical Medicine nga nanari-sari nga brand sang test kits lakip na ang ginhimo sang University of the Philippines- ang igahatag agud nga mapuslan ang iban nga machine.
