ILOILO CITY – Nakadepende sa mangin resulta sang COVID-19 test sang kapin 200 ka residente ang pagpalawig sang Surgical Extreme Enhanced Community Quarantine sa Zone 2, Bo. Obrero, Lapuz, Iloilo City.
Sa interview sang Bombo Radyo kay Barangay Kagawad James Conlu sang nasambit nga lugar, iya ginpahayag nga sa subong, wala pa sila sang may nabaton nga kopya sang COVID-19 test results sang 173 ka residente nga naka-angkon sang close contact sa 3 ka COVID-19 positive kun sa diin isa ang ginbawi-an sang kabuhi.
Suno kay Conlu, kutub subong nga gab-i, Hulyo 25, lang kun tani ang pagpatuman sang Surgical Extreme Enhanced Community Quarantine sa 20 ka balay apang magapadayon ang lockdown tubtub nga wala pa ginpaguwa ang COVID-19 test results.
Ginpahayag ni Conlu nga may report nga ang tanan nga specimen nga ginproseso sa Western Visayas Medical Center Subnational Laboratory ang nagnegatibo sa virus.
Ang mga residente nga natumod nga naka-angkon sang close contact sa tatlo ka COVID-19 positive apang wala nagpakuha sang swab sample ang ginpaidalom sa 14-day mandatory quarantine.
