POTOTAN, ILOILO – Wala sang foul play sa kamatayon sang isa ka preso sa Iloilo District Jail sa Brgy. Nanga, Pototan, Iloilo.
Ini ang panindugan ni Bureau of Jail Management and Penology Region 6 Assistant Regional Director for Adminsitration Jail Supt. Gilbert Peremne may kaangtanan sa reklamo sang pamilya Solacito tuhoy sa makatilingalahan nga kamatayon sang ila himata.
Suno kay Peremne, Hulyo 18 sang na report nga ginbawi-an sang kabuhi ang preso nga si Nicasio Solacito, 44 anyos sang Sta. Barbara, Iloilo.
Ginpahayag ni Peremne nga bangungot ang ginkamatay ni Solacito kun sa diin sang Hulyo 17, nakita pa ang preso nga nagkaon sang noodles.
Apisar nga wala sang foul play, ginpahayag ni Peremne nga may yara sang imbestigasyon nga patigayunon agud nga makahatag man sang paathag ang pamunu-an sang Iloilo District Jail may kaangtanan sa alegasyon sang pamilya nga may yara sang kapabayaan nga natabo.
Santo sa report, gindala pa sa hospital ang biktima apang wala na natabangan pa kag sa bahin naman sang pamilya Solacito, pila na ka adlaw nga napatay ang ila himata antes sila nakahibalo.
