GUIMARAS – Istrikto nga ginapatuman sang Highway Patrol Group – Guimaras ang pagdumili sa angkas sa motorsiklo nga wala sang barrier sa tunga sang driver kag sang pasahero bilang precautionary measure batok sa Coronavirus Disease 2019 (COVID-19).
Sa interview sang Bombo Radyo kay Police Staff Sergeant Randy Centina sang Highway Patrol Group – Guimaras, iya ginpahayag nga kutub lang sa Hulyo 31 ang igahatag nga konsiderasyon apang limitado lamang sa mag-asawa ukon naga-istar sa isa ka balay.
Suno kay Centina, paglampas sa nasambit nga petsa, dakpon kag hatagan sang nagakaigo nga silot ang violators.
Para naman sa mga mag-asawa ukon naga-istar sa isa lang ka balay, kinahanglan nga magpakita lamang sang certification halin sa Barangay Council.
