ILOILO CITY – Wala nanami-an ni Msgr. Meliton Oso, director sang Jaro Archdiocesan Social Action Center, sa nangin State of the Nation Address ni Pres. Rodrigo Duterte.
Sa interview sang Bombo Radyo kay Msgr. Oso, iya ginpahayag nga wala na siya sang “expectations” ukon ginalauman sa mensahe ni Presidente Duterte bangud nga kasubong sa mga nauna nga State of the Nation Address, madamo nga promisa ang wala natuman.
Lakip diri suno kay Msgr. Oso amo ang pagtapos sa Endo, madamo nga proyekto paagi sa Build, Build, Build program kag ang pagsolbar sa West Philippine Sea dispute.
Ginpahayag ni Msgr. Oso nga sa baylo nga development, lapnagon nga kapigaduhon kag kurapsyon ang nagakatabo.
Gin-athag ni Msgr. Oso nga wala niya ginapakamalaot ang gobyerno sang Pilipinas sa baylo, iya lamang ginapabutyag ang pagkadismaya.
Sa pihak sini, ginpahayag sang natungdan nga indi man siya dalok sa paghatag sang pagdayaw kun may yara sang dalayawon sa ginahimo sang gobyerno.
Nahibalu-an nga isa ang natungdan sa nagpakigbahin sa SONAgkaisa protest nga ginpatigayon sa Sunburst Park Iloilo kadungan sang ika-lima nga State of the Nation Address sang Presidente.
