ILOILO – Ginpaboran ni Iloilo Gov. Arthur Defensor Jr. ang nangin pahayag ni Presidente Rodrigo Duterte nga dapat nga paayuhon ang serbisyo sang existing telecommunications companies sa pungsod.
Sa interview sang Bombo Radyo kay Defensor, iya ginpahayag nga indi mahinago nga tuman ka mahal apang tuman man ka hinay ang internet speed sa Pilipinas kun ipaanggid sa iban nga pungsod sa Southeast Asia.
Suno kay Defensor, labi nga kinahanglanon sa subong ang internet ilabi na sa online classes kag sa pagpasanyog sang negosyo.
Isa man sa ginpaboran ni Defensor amo ang mga programa nga ginpromisa sang Presidente agud nga mapasanyog ang rural communities kag ang programa para sa pagpasanyog sa sektor sang Agrikultura.
Samtang, padayon naman ang pagbaton sang Iloilo Provincial Government sa mga nagapauli nga Locally Stranded Individual kag repatriated Overseas Filipino Workers bilang kabahin sang Hatid Tulong program.
Sa pagkamatuod suno sa gobernador, ginpahibalo na siya tuhoy sa natalana nga mga flights kun sa diin sakay ang mga returning residents.
Pag-abot sa Iloilo, ginpasalig sang gobernador nga ipaidalom sa Reverse Transcription Polymerase Chain Reaction test ang nagpauli nga mga Ilonggo.
