ILOILO CITY – Temporaryo nga siraduhon ang Esplanade 6 agud nga indi na masulit ang natabo nga pagsulod sang salakyan nga ginapanag-iyahan sang anak sang tag-iya sang Roprim Construction.
Sa interview sang Bombo Radyo kay Iloilo City Mayor Jerry Treñas, iya ginpahayag nga butangan sang barikada ang entrance kag exit sang Esplanade 6.
Suno kay Treñas, wala pa na turn-over sang Department of Public Works and Highways sa Iloilo City Government ang nasambit nga proyekto.
Bangud sini, ginpahayag ni Treñas nga iya anay nga gin-istorya si Engr. Rodney Gustilo sang Department of Public Works and Highways-Iloilo City kag Engr. Salvador Pedregosa, officer-in-charge sang City Engineer’s Office kun ano ang ila mangin lihok.
