ILOILO CITY – Balik na sa normal ang trabaho sa Technical Education and Skills Development Authority Region 6 matapos nga gindula na ang lockdown kasunod sang pagpositibo sang isa ka empleyado sa Coronavirus Disease 2019 (COVID-19).
Sa interview sang Bombo Radyo kay TESDA Region 6 Director Gaspar Gayona, iya ginpahayag nga ang iban sa mga empleyado ang naka work from home samtang ang isa ka empleyado nga nagpositibo sa COVID-19 ang yara na sa recovery stage.
Suno kay Gayona, ginahulat na lang ang resulta sang ika-tatlo nga confirmatory test sang nasambit nga pasyente nga na-assign sa Guimaras.
May kaangtanan diri, ginpahayag ni Gayona nga lunsay nagnegatibo sa COVID-19 ang mga naka-angkon sang close contact sa nasambit nga pasyente.
Samtang, pagatutukan sang ahensya ang pagpatigayon sang mga programa ilabi na ang may kaangtanan sa agrikultura.
Sa pagpaathag ni Gayona, natalana nga igalunsyar ang online COVID-19 program kun sa diin ang tanan nga staff, manunudlo kag estudyante ang required nga magpaidalom sa nasambit nga online learning process.
Ang nasambit nga lihok suno sa natungdan ang kabahin sang precautionary measure sang ahensya batok sa COVID-19.
