ILOILO CITY – Nagapabilin nga sirado ang Pedia Ward kag Medical Charity Ward sang West Visayas State University Medical Center kasunod sang pagpositibo sang duha ka pasyente sa COVID-19 paagi sa Rapid test.
Sa interview sang Bombo Radyo kay Dr. Diosdado Amargo, designated spokesperson sang nasambit nga hospital, iya ginpahayag nga wala anay sang pagabatunon nga pasyente sa Pedia Ward bangud may 10 ka tuig nga bata nga IgG positive sa Rapid test.
Buot-silingon suno kay Dr. Amargo, may yara na sadto sang exposure sa virus ang bata kag sa subong, ginahulat na lang ang resulta sang confirmatory test.
Sa pagpaathag ni Dr. Amargo, protocol na nga antes pa man ang medical operation, kinahanglan nga ipaidalom sa COVID-19 test ang pasyente para sa seguridad sang tanan nga yara sa hospital.
Apisar sini, gin-athag ni Dr. Amargo nga ginkuhaan na sang swab sample para sa COVID-19 test kag gin-isolate naman ang tanan nga close contacts sang 10 ka tuig nga bata apang indi naman apektado sang lockdown ang private room para sa Pedia patients.
Samtang, ginsirado man ang Medical Charity Ward kasunod sang pagpositibo sang isa ka pasyente sa COVID-19 paagi sa Rapid test.
Sa subong, lunsay negatibo ang resulta sang confirmatory test samtang ginahulat naman ang test results sang mga resident physicians nga naka-assign sa nasambit nga department.
Ang tanan nga mga pasyente suno sa natungdan ang lunsay asymptomatic kag nagapadayon ang contact tracing agud mahibalu-an kun pila gid ang kabug-usan nga numero sang mga dapat ipaidalom sa COVID-19 test kag dapat nga i-quarantine.
