ILOILO CITY – Tatlo ka mga rason ang ginplastar sang Philippine Society of Mechanical Engineers kun nga-a ila ginapamatukan ang pagbutang sang barrier sa motorsiklo.
Nahibalu-an nga subong nga adlaw, Agosto1, pagadakpon na sang Philippine National Police ang mga motorcycle riders nga nagapasakay sang angkas nga wala sang barrier sa tunga sang driver kag sang pasahero.
Sa interview sang Bombo Radyo kay Engr. Jeriel Militar, Panay President sang Philippine Society of Mechanical Engineers, iya ginpahayag nga may yara sila sang position paper nga ginpasa sa National Inter-Agency Task Force, kay Sec. Carlito Galvez Jr., chief implementer sang National Task Force Against COVID-19 kag kay Joint Task Force Covid Shield commander Lt. Gen. Guillermo Elazar apang tubtub subong, wala pa sang feedback.
Suno kay Engr. Militar, lakip sa mga rason kun nga-a indi dapat pag-ipatuman ang pagbutang sang barrier amo nga delikado ini para sa rider kag pasahero ilabi na kun madasig ang pagmaneho sang motorsiklo kag ang barrier ang indi garantiya nga makahatag sang proteksyon sa pasahero kag sa driver santo sa Aerodynamics.
Magluwas diri, magasto sa gasolina sa rason nga nagakinahanglan gid nga mamwersa ang motorsiklo bangud sa kabug-aton sang barrier sa tion nga iguon ini sang hangin.
Ang nasambit nga mga rason suno sa natungdan ang santo sa computational fluid dynamics simulation nga ginpatigayon sang mga Mechanical Engineers sa pungsod.
