AJUY, ILOILO – Palaligban para sa pila ka residente sang Brgy. Pantalan Nabaye, Ajuy, Iloilo kun nga-a wala gid sila nalakip sa Social Amelioration Program.
Sa interview sang Bombo Radyo sa tagreklamo nga nagpahinago lang sang pangalan, iya ginpahayag nga ang iban sa ila ang wala gid nakabaton sang P6,000 nga ayuda kag bisan sa cash for work man lang.
Suno sa tagreklamo, isa siya sa mga nakapasa sang kumpleto nga requirements apang wala gid sang may nabaton nga cash assistance.
Ginpahayag sang tagreklamo nga ila naman nga ginpamangkot ang ila Punong Barangay apang suno sa opisyal, ang Municipal Social Welfare and Development Office na lang ang makasabat.
Sa pagpaathag naman ni Punong Barangay Jerry Destacamento, sa masobra sa 60 ka benepisyaryo sa ila lugar, 20 diri ang wala na nalakip sa pinal nga listahan.
Depensa ni Destacamento, indi siya mahimo nga makapahilabot bangud may mga barangay officials na nga ginkasuhan bangud sa pagpahilabot sa Social Amelioration Program.
Ang Department of Social Welfare and Development lang suno sa Punong Barangay ang makasabat kun nga-a may mga benepisyaryo nga wala na nalakip sa listahan.
