ILOILO CITY – Mahimo nga Geopolitical move lamang ni Presidente Rodrigo Duterte ang pagbuya sang pahayag nga wala na siya sang may mahimo sa West Philippine Sea dispute batok sa China.
Sa pagpaathag sang law expert nga si Atty. Joenar Pueblo, indi matuod nga inutil ang Pilipinas kun ikasarang sa pagpakigbato sa China ang pagahambalan apang kwestyonable lang ang rason kun nga-a gintawag sang Presidente ang kaugalingon nga inutil.
Suno kay Atty. Pueblo, maathag nga ang Pilipinas ang nagapanag-iya sang mga isla sa West Philippine Sea kun sa diin mismo ang Permanent Court of Arbitration sa The Hague, Netherlands ang nagpaguwa sang desisyon pabor sa pungsod.
Ginpahayag ni Atty. Pueblo nga santo sa desisyon, peke ang 9-dash line nga ginpakita sang China kun sa diin nakasulod sa ila teritoryo ang mga isla nga sa pagkamatuod, ginapanag-iyahan sang Pilipinas.
Ang United Nations Convention on the Law of the Sea suno kay Atty. Pueblo amo ang ginbasehan kun nga-a naga-eksister ang Permanent Court of Arbitration nga isa ka intergovernmental organization nga amo ang nakatuka sa pagresolba sang away may kaangtanan sa arbitration.
Apisar sang mga pagpakamalaot, ginpahayag sang natungdan nga indi niya mabasol si Presidente Duterte bangud siya lamang sa subong ang pinakamataas nga opisyal nga mahimo makadesisyon agud nga balansehon kun ano ang makapaayo sa kadam-an ilabi na subong nga may pandemya.
Mahimo suno sa abogado nga luyag lamang sang Presidente nga makasiguro nga isa ang Pilipinas sa pagahatagan sang COVID-19 vaccines nga gin-develop sang mga Chinese experts nga rason sang iya nga pagpa-ubos sa China.
