ILOILO CITY – Sirado kag may yara sang nagabantay sa gate sang Iloilo Fish Port Complex kasunod sang pagtaliwan sang isa ka senior citizen bangud sa Coronavirus Disease 2019 (COVID-19).
Sa interview sang Bombo Radyo kay Punong Barangay Dominador Deocampo sang Tanza Baybay, Iloilo City, iya ginpahayag nga may prsonnel sang Philippine National Police kag sang Philippine Coast Guard nga nagabantay sa palibot sang Iloilo Fish Port Complex.
Ang supply sang isda nga ginbakal sa Palawan kag Antique suno kay Deocampo ang ginabaligya na lang sa higad sang dalan sa guwa sang fishing port.
Ginpahayag ni Deocampo nga agud masunod ang minimum health standards, may yara sang mga barangay tanod gikan sa mga kaiping nga barangay nga nagabantay.
Santo sa mandu ni Iloilo City Mayor Jerry Treñas, ang closure nga nag-umpisa kahapon, Agosto 2, ang magalawig sang 3 ka adlaw agud hatagan-ligwa ang disinfection kag contact tracing.
Matandaan nga ginkumpirma sang alkalde nga ginbawian sang kabuhi ang isa ka COVID-19 patient nga nagatrabaho sa Iloilo Fish Port Complex.
