ILOILO CITY – Ginahulat sang Regional Inter-Agency Task Force ang abiso gikan sa national level may kaangtanan sa pagpapauli sa madamo nga Locally Stranded Individuals nga yara nagatinir sa Ninoy Aquino International Airport.
Sa interview sang Bombo Radyo kay Atty. Roy Villa, tagpamaba sang Regional Inter-Agency Task Force, iya ginpahayag nga wala siya sang numero kun pila gid ang kabug-usan nga mga Locally Stranded Individuals nga magapauli sa Western Visayas halin sa Metro Manila.
Suno kay Atty. Villa, ang National Inter-Agency Task Force ang magadesisyon kun tani kun san-o makapauli ang mga Locally Stranded Individual ilabi na nga ginpaidalom sa Modified Enhanced Community Quarantine ang Metro Manila kag ginmandu ni Presidente Rodrigo Duterte nga ipakansela anay ang flights kag ang byahe sang barko magluwas sa arrange special flights.
Ginpahayag Atty. Villa nga ang Reverse Transcription Polymerase Chain Reaction (RT-PCR) test results ang isa sa mga requirements nga ginkasugtan sang Inter-Agency Task Force apang may iban naman nga airline company sa bulig sang Local Government Unit nga nagabaton sang Rapid Antibody test.
Sa Western Visayas, ang Provincial Government sang Capiz gid lang ang nakapatigayon sang special flights kun sa diin may mga staff nga nagasugat sa mga Capizeño apang may iban naman nga nakapangita sang paagi agud nga makapauli.
Agud nga magligwa ang tagsa ka facility quarantine, naghingyo sang moratorium ang mga Local Government Units apang wala pa sang pormal nga sulat nga ginpadala sa Inter-Agency Task Force.
