AJUY, ILOILO – Padayon pa sa gihapon nga ginapangita ang suspek nga nagpatay sa magpakaisa sa Sitio Nabitasan, Brgy. Tipacla, Ajuy, Iloilo.
Ang mga biktima amo sanday Rolly Herida, 45 anyos kag Alberto Herida, 43 anyos samtang pilason naman si Primitivo Herida, 65 anyos, lunsay residente sang nasambit nga lugar.
Sa exclusive interview sang Bombo Radyo kay Police Captain Roy Castro, hepe sang Ajuy Municipal Police Station, iya ginpahayag nga nakig angot naman sila sa pamilya sang suspek nga si Romeo Balino Jr., 37 anyos kag residente sang nasambit nga barangay.
Suno kay Castro, matapos ang hot pursuit operation, wala sa gihapon sila sang matumod nga lugar nga ginpanaguan sang suspek.
Matandaan nga gin-ako mismo sang suspek sa Bombo Radyo nga antes natabo ang insidente, magka-upod pa sila nga nag-inom sa tyangge.
Suno kay Balino, nagbaisay sila nga tatlo apang sang hana na siya nga magbayad, hinali siya nga gindakop kag ginsumbag sang mga biktima.
Ginpahayag ni Balino nga nadulaan siya sang pangalibutan tubtub nga nakabugtaw siya kag nakita nga nagsaylo naman sa balay ni Primitivo Herida ang mga biktima kag samtang naga-inum, nabati-an niya nga siya ang gina-istoryahan.
Si Rolly ang may duha ka pilas sa likod samtang si Alberto ang may pilas sa ulo, abaga kag puwak kag gindeklarar nga patay sang mga doktor.
Napilasan naman sa ilong si Premitivo nga naka-guwa na sa hospital.
Nakuha sa crime scene ang anum ka fired cartridges kag isa ka live ammunition sang .45 caliber pistol.
