ILOILO – Naka-alerto na ang mga Barangay Health Emergency Response Teams sa probinsya sang Iloilo may kaangtanan sa contact tracing kasunod sang na record nga kaso sang Coronavirus Disease 2019 (COVID-19) sa Iloilo Fish Port Complex.
Sa interview sang Bombo Radyo kay Provincial Administrator Atty. Suzette Mamon, iya ginpahayag nga may yara na sang mandu si Gov. Arthur Defensor Jr. sa tagsa ka Municipal Health Officer nga pasangkaron ang contact tracing agud mahibalu-an kun sanday sin-o ang nakapadulong sa fish port kag posible nga may close contact sa nga COVID-19 positive.
Suno kay Mamon, ang Barangay Health Emergency Response Teams amo ang magapahibalo sa Municipal Health Officer tuhoy sa identity sang mga nakapadulong sa fish port.
May kaangtanan diri, ginpahayag ni Mamon nga may residente na sang Tubungan kag Ajuy nga nakapadulong sa fish port kag nagpositibo sa COVID-19.
Ang mga pasyente suno sa natungdan ang naka-facility quarantine sa subong.
Ginhalimbawa man sang Provincial Administrator ang natabo sa Concepcion kun sa diin ang tanan nga fish brokers nga nakapadulong sa fish port ang ginpaidalom sa confirmatory test kag gin-quarantine.
Padayon naman ang close coordination sa tunga sang City kag sang Provincial Health Office.
