ILOILO CITY – Epektibo na umpisa 8:00 subong nga gab-i (Agusto 7) ang mas ginpatemprano nga curfew sa syudad sang Iloilo.
Sa panibag-o nga mandu ni Iloilo City Mayor Jerry Treñas, ang curfew ang maga-umpisa 8:00 sa gab-i tubtub 4:00 sa kaagahon.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga 25 ka personnel halin sa iya talatapan ang gin-deploy sa palibot sang syudad.
Suno kay Conlu, kabulig sang PTSMO personnel sa pagpatuman sang curfew amo ang Philippine National Police.
Lakip sa exempted amo ang mga nagapauli halin sa trabaho apang kinahanglan nga may yara sang ipakita nga Identification Card kag iban pa nga pamatuod kag kun may yara sang emerhensya.
May kaangtanan diri, ginpahayag ni Iloilo City Police Office Director Police Col. Eric Dampal nga antes dakpon kag presuhon, mahimo nga palantawon sang film tuhoy sa COVID-19 kag pagahatagan sang silot nga community service ang madakpan nga violator.
Sa subong suno kay Dampal, wala pa sila sang guidelines nga nabaton rason nga mas manubo lang anay nga silot ang igahatag sa mga madakpan.
