ILOILO CITY – Mas ginpataasan ang penalty para sa mga madakpan nga wala nagasuksok sang face mask sa pampubliko nga lugar sa syudad sang Iloilo.
Sa interview sang Bombo Radyo kay Iloilo City Councilor Ely Estante, sponsor sang nasambit nga ordinansa, iya ginpahayag nga mismo si Iloilo City Mayor Jerry Treñas na ang nagpanugyan nga amyendaran ang ordinansa nga nagahatag sang silot sa mga wala nagasuksok sang face mask lakip na diri ang sa curfew.
Suno kay Estate, mangin epektibo ang gin-amyendaran nga ordinansa, 15 ka adlaw matapos ang publication sini.
Ginpahayag ni Estante nga sa 1st offense: P1,000 ang multa plus community service, 2nd offense: P2,000 ang multa plus community service kag sa 3rd offense: P3,000 ang multa, community service kag pasakaan sang kaso ang violator.
Ang community service suno kay Estante ang nakadepende sa offense nga nahimo indi kaangay sang una nga sa tagsa ka violation, P500 lamang ang multa.
Kun tuhoy naman sa mandatory nga pagsuksok sang face shield, ginpahayag sang natungdan nga pagasundon kun ano ang mangin silot nga igahatag sang national government nga amo ang implementer sini.
