ILOILO CITY – Nagbalik sa syudad sang Iloilo matapos malagyo ang isa ka pakyaw sang Iloilo Fish Port Complex sang kuhaan ini sang swab sample para sa COVID-19.
Sa interview sang Bombo Radyo kay Punong Barangay Noel Soliman sang Rizal Pala-Pala 2, Iloilo City Proper, iya ginpahayag nga sang adlaw nga kuhaan sang swab sample ang nasambit nga pakyaw, nalagyo ini kag nagpadulong sa probinsya sang Antique bangud nakabatyag ini sang kulba.
Indi lang mapat-od sang punong barangay kun diin partikular sa Antique nagpadulong ang pakyaw.
Apang sang didto na siya sa Antique , gin hold ini kag ginkuhaan sang swab sample bangud nahibaluan kun sa diin ini naghalin.
I-quarantine na kuntani ang nasambit nga pakyaw apang nalagyo na naman ini kag nagbalik sa syudad.
Natingala si Punong Barangay Soliman kun paano nakasulod ang pakyaw sa nasambit nga barangay apang iya natukiban nga nagtaklas ini sa kudal.
Base sa resulta sang RT-PCR test sang pakyaw, nahibaluan nga positibo ini sa COVID-19.
Bangud sini, gintawgan ni Soliman ang Iloilo City Health Office agud ipahibalo nga yara sa ila paghinakop ang COVID-19 patient nga nalagyo kag nagbalik sa ila barangay.
Nahibaluan nga ang ginikanan sang amo nga pasyente ang lunsay mga residente man sang Rizal Pala-Pala 2 kag mismo ang amay sini nga trabahador sa Iloilo Fish Port Complex ang nagpositibo man sa virus.
