Mga fish vendor, pakyaw, driver kag iban pa nga nakapadulong sa Iloilo Fish Port Complex, ginapa-idalom sa RT-PCR test sa banwa sang Concepcion

CONCEPCION, ILOILO – Nagapangabay si Concepcion Iloilo Mayor Raul Banias sa tanan nga mga residente sang banwa nga nakapadulong sa Iloilo Fish Port Complex humalin sang Agosto 1 nga makigangot sa Municipal Health Office agud makuhaan sang swab sample para sa COVID-19.

Sa interview sang Bombo Radyo kay Mayor Banias, iya ginpahayag nga sa subong may yara na sang 15 ka mga indibidwal ang ginpa-idalom sa RT-PCR test kag gin-abisuhan nga indi magguwa kag magpabilin sa sulod balay.

Suno sa alkalde, indi contact tracing ang iya ginahimo kundi lunsay disease surveillance bangud may yara sang local transmission sa Iloilo Fish Port Complex kag ini ang kabahin lang sang precautionary measure.

Dugang pa sang natungdan, wala man nabudlayan ang local government unit sang Concepcion sa mga fish vendor, operator, pakyaw kag iban pa bangud nagakooperar man ang mga ini sa lihok nga ginahimo sang banwa.