STA.BARBARA, ILOILO – Nabudlayan ang Local Government Unit sang Sta. Barbara, Iloilo sa pagpatigayon sang contact tracing kasunod sang na record nga tatlo ka local transmission sang COVID-19.
Sa inerview sang Bombo Radyo kay Mayor Rema Somo, iya ginpahayag nga ang una nga local transmission amo ang non-medical staff sang isa ka hospital sa syudad sang Iloilo.
Suno kay Somo, pila ka bulan nga naka-istar sa syudad sang Iloilo ang nasambit nga non-medical staff kag sang ulihi, nakabatyag sang sintomas sang COVID-19.
Bangud sini, nagpakuha sang swab sample para sa COVID-19 test ang non-medical staff kag natukiban nga nagpositibo sa virus apang antes pa man nagpa-admit sa hospital, nakapauli pa sa ila balay ang nasambit nga pasyente.
Bangud sini, gin-lockdown ang balay sang pasyente kag ginpaidalom sa home quarantine ang mga himata.
Ang ika-duha nga local transmission naman suno kay Somo amo ang close contact sang isa ka COVID-19 positive.
Ang pasyente suno sa alkalde ang naka-angkon man sang madamo nga mga close contacts rason nga gin-lockdown ang bug-os nga sitio kun sa diin nagapauli ang pasyente.
Ang ika-tatlo naman nga local transmission amo ang isa ka beautician nga close contact sang isa ka COVID-19 positive nga iya nangin customer sa parlor.
Sa pagpaathag sang natungdan, gin-lockdown na ang parlor kag padayon ang contact tracing ilabi pa nga madamo nga lugar ang ginpadulongan sang COVID-19 patient.
