BEIRUT, LEBANON – Nakadesisyon na nga indi magbalik sa Beirut, Lebanon ang isa ka Ilongga domestic helper matapos ang natabo nga massive explosion kun sa diin madamo ang pilason kag ang ginbawi-an sang kabuhi.
Sa interview sang Bombo Radyo kay Jaysan Rose Dacumos sang Miag-ao, Iloilo, iya ginpahayag nga sang natabo ang pagsigabong, kaupod niya sa sulod sang balay ang mga kabataan kag ang iloy sang iya employer.
Suno kay Dacumos, makapila pa siya ka beses nga ginpamangkot sang iloy sang iya employer kun ano ang gahod nga ila nabati-an tubtub nga sang ulihi, nabatyagan na lang nila ang mabaskog nga pagtay-og.
Ginpahayag ni Dacumos nga sang nagsigabong, nagapanghugas siya sang pinggan kag apisar malayo na ang ila lugar sa ginluntaran sang insidente, nabatyagan nila sa gihapon ang mabaskog nga pagtay-og kag bangud sini, nabuy-an niya ang plato nga iya gina-uyatan.
Ang isa sa iya mga alaga nga bata ang diutayan lang matumbahan sang refrigerator kag bangud sa kakulba, wala na sila sang may nahimo kundi maghibi na gid lamang.
Bangud sa trauma, ginpahayag sang natungdan nga naglisensya na siya sa iya employer nga indi na lang magbalik sa tion nga makapauli sa Pilipinas apisar nga 11 na siya ka tuig nga nagatrabaho bilang domestic helper.
