ILOILO CITY- Dismayado si Iloilo 3rd Dist. Rep Lorenz Defensor sa Department of Health bangud sa kapaslawan nga magamit sang maayo ang pondo sang gobyerno para sa pag-hire sang dugang nga mga health care workers sa tunga sang ginapangatubang nga COVID-19 pandemic.
Sa interview sang Bombo Radyo kay Congressman Defensor, iya ginpahayag nga indi nangin epektibo ang ahensya sa pagtalupangod sa amo nga problema sa kakulang sang healthcare workers.
Suno kay Defensor, halos wala man sang maathag nga mihura ang ahensya may kaangtanan sa paghatag sang financial assistance sa mga healthcare workers nga napatay ukon naospital bangud sa COVID-19.
Ginkondena man sang mamalidha ang Philippine Health Insurance Corporation (PhilHealth) bangud sa ginakaulamiran nga anomaliya sa korapsyon ilabi subong nga madamo ang nagakapatay kag madamo ang pigado bangud sa pandemya.
May kaangtanan naman sa pagpasar na sa third and final reading sang Bayanihan to Recover As One Act ukon ang Bayanihan 2, nagalaum si Defensor nga magamit sang husto ang P162-billion standby funds.
Suno sa mamalidha,kuntani ipahigad man sang kongreso ang mga bagay nga indi kinahanglan kaangay sang death penalty bill kag talupangdon ang mga isyu nga mas importante kag kinahanglan sang mga Pilipino.
Nahibaluan nga isa si Defensor sa 242 affirmative votes ,may anom nga nagkontra kag wala naman sang pag-abstain angot sa House Bill No. 6953 nga magahatag sa mga tawo sang nagkalain-lain nga bulig sa tion sang pandemya.
