ILOILO – Indi magnubo sa 430,000 ka enrollees ang na record sang Department of Education sa probinsya sang Iloilo para sa school year 2020-2021.
Sa interview sang Bombo Radyo kay Dr. Roel Bermejo, Department of Education-Iloilo Schools Division Superintendent, iya ginpahayag nga sa subong, ang nasambit nga numero ang humalin sa Kindergarten tubtub sa Senior high School.
Suno kay Bermejo, makabig nga very challenging para sa Department of Education ang pagpatigayon sang klase subong nga 2020 apang indi rason ang pandemya agud nga mautod ang pagtuon sang madamo nga estudyante.
Ang pagpanghangkat suno kay Bermejo ang indi gid madula rason nga nagapabilin nga positibo ang ahensya nga mangin madinalag-on ang patigayunon nga blended-learning.
May kaangtanan diri, indi naman makaapekto sa pagbukas sang klase ang paggamit sa mga classrooms ukon school building nga quarantine facility para sa Locally Stranded Individuals kag returning Overseas Filipino Workers.
Sa pagpaathag ni Bermejo, may yara na nga daan sang contingency plan ang ahensya sa tion nga kinahanglanon ang limited face-to-face classes.
Sa pagpaathag ni Bermejo, indi bug-os nga eskwelahan ang ginagamit nga quarantine facility rason nga ang iban nga building ang mahimo pa nga magamit sang mga estudyante.
Kun kulangon gid man suno kay Bermejo, may yara sang designated facility nga mahimo gamiton sa pagpatigayon sang klase.
Kun tuhoy naman sa produksyon sang modules, ginpahayag sang DepEd official nga indi tanan nga estudyante ang nagpili sang printed module bangud may iban nga nagpili sang digitized module depende sa sitwasyon.
Bangud nga kalabanan ang nagpili sang modular distance learning, ginatutukan sang ahensya ang pagpatuman sang learning arrangement.
Sa subong suno sa natungdan, ang tagsa ka school management sa probinsya sang Iloilo ang may yara sang learning resources coordinators kun paano ang distribution sang modules agud magamit gilayon sa Agosto 24.
