LIMA, PERU – Atensyon sa mga tawo nga indi kabalo makuntento.
Nagapati ka man bala sa hambalanon nga wala sang sekreto nga indi mahibaluan?
Sang gin lunsyar sang 2005 ang Google Maps, nangin mas malapit kag mahapos makit-an ang lugar.
Ang ini nga tool ang nagahatag sang kahigayunan agud nga mabisita ang isa ka lugar sa diin may yara ikaw sang makit-an nga pictures lakip na ang mga tawo sa lugar.
Apang nakahibalo ka bala nga may yara na sang na heartbroken kag naghilibi-on bangud lang sa Street View tool sang Google Maps?
Didto sa Lima, Peru, nagtuga sang sakit sa balatyagon sang bana ang iya nakit-an nga picture sa diin nagapungko ang iya nga asawa samtang may iban nga lalaki nga nagahigda sa paa sini.
Apisar nga blurred ang bahin sang nawong sang babaye sa diin ini ang standard practice sa Google Maps agud man ma protektahan ang privacy sang mga tawo, nakilal-an sa gihapon sang bana ang iya asawa bangud pamilyar ini sa panapton nga suksok sang babaye.
Bangud sini, iya ginprangka ang babaye kag sa ulihe nag-ako man ini nga may yara siya sang iban nga lalaki.
Apisar nga masakit para sa bana, iya na desisyonan nga bulagan na lang ang asawa.
Gani sa inyo dira, agud indi kamo pag bayaan sang inyo nobyo, nobya, bana ukon asawa, makahibalo makuntento sa isa.
